chee's profile喵喵芝的無聊國度PhotosBlogListsMore  |  Tools Help |
|
March 30 何B女運動會城珠及他的男友今日來我家探何B仔，還送了好多份禮物給我，包括：
1. 分清何B仔身份，原來牠是女仔，所以要改叫我B女，教曉我用紙屑給線頭做廉價貓玩具。
2. 用紙屑及線做廉價貓玩具，何B女玩到癲哂。
3. 幫何B女剪指甲
4. 訓練何B女成為運動能手，包括相撲、跳高、體操、籃球
5. 替何B女影了一輯靚靚相
6. 何B女做了報紙專欄主角
多謝你呀﹗城珠﹗ March 22 邊個危險D？尋日公司冇乜人，難得地可以開架公司車去火車站會合阿昇，可能我太耐冇開車啦，英強鬼死咁擔心，千叮萬囑叫我小心D，開慢D。雖然我都有少少緊張，但開落又冇乜野，好順利咁出左公司。但去到燈位先發現，咦﹗點解我冇鬆手掣就開車既？但更驚既係，點解架車冇鬆手掣都可以行。究竟係我危險D？定係架車危險D呢？ March 20 殺警案死亡筆記版最近好多人討論殺警案，由於好多疑點，槍戰當日出現好多唔同的版本，但係都冇個解得通。但我班醒目同事，竟然有以下解釋：
本簽更簿其實係死亡筆記，而冼家強就係更簿上寫低事發經過，因為凡寫名者都會死，四十秒後事件就依住更簿上的事一一發生，徐步高同曾國恒互相射擊死亡，冼家強就子彈只係擦臉而過，大命不死。
以上內容純屬虛構，但又講得通喎。死未﹗ 何B仔大個仔今日同何B仔影相，發現佢個樣已經變左，變得大個左。那一刻先發現，何B仔身長現有尺半，同岩岩黎何家時，只有一隻手板咁大隻，大左一倍有多。
不過佢就越來越貪玩，會好似爬樹咁爬上人大脾，痛到個個叫救命，又成日在貓砂上面碌黎碌去，搞到成身臭崩崩，想摸佢時，又唔畀你摸，一定要爪你隻手。但自從我聽大芝意見，在超級巿場買了包Temptation的貓零食，鬆脆的麵包皮包住軟軟的吞拿魚，一開就香味四散，傳說所有貓都臣服於呢隻貓零食手上，果然，何B仔食完一粒後，就乖乖馴服我手下，家陣每逢我返屋企，佢無論在屋的邊一忽，都會即時標出黎，朝早又例必入房叫醒我，然後跟我入廁所，又跟我出廳，成隻狗狗咁。「貓殺手」Temptation威力果然厲害。 March 11 長洲櫻花兩星期前長洲開左一棵櫻花，咁難得香港有櫻花，點都要去睇睇，同時試下我支sigma新鏡頭。點知今日去到又係得一棵，仲未可以影到遍地櫻花的靚景，有d失望，下星期再去先得，希望開得哂﹗
其實櫻花都好似桃花﹗ March 08 何B仔一定變肥貓呢幾日何B仔個貓兜總係滿滿的，唔知邊個幫我餵左佢，搞到我想餵都唔得。今日難得見到個兜冇野，拿拿淋倒貓糧落去，原來我阿媽冇耐前餵過，再問之下，我阿爸、細佬、阿哥個個都餵過何B仔，咁佢一日究竟食幾多餐？何B仔幾個月後咪變超級大肥貓？
當初我話養何B仔，個個都灑手兼擰頭，但家陣爭住餵佢，點先？最激氣係，屎就留返我執。喂﹗攞左餵貓權利，盡下剷屎義務好喎﹗ 打隊制保齡好好玩幾個禮拜冇碌過齡，今朝又同同事去，同Brian一隊鬥奇里夫、阿昇及文仔、阿琦，奇里夫一來就連續五個全中，總分彈到上203分，嚇到我地個個眼都突埋。本來冇乜狀態、第一局都只係得109分的我，突然畀奇里夫激發，第二局都追到百四分，第三個同奇里夫隊鬧過你死我活，結果Brian打169分，我打157分，欠勝10分。打完之後，發覺竟然成身汗，原來打隊制係好緊張架﹗ March 06 溝掂何B仔唔知係咪我最近成日逗何B仔玩，佢今日竟然主動跳上我大脾，好乖咁伏低，搞到我唔捨得推開佢，結果遲左出門口，搭唔到廠車返公司。夜晚返黎之後，佢又時不時走上我大脾玩，雖然有時玩得太喪，唔覺意出爪，爪到我鬼死咁痛，不過都值得既，證明我已經溝掂何B仔，取得佢的信任。
我頭先翻睇傅俊偉的「貓貓幼稚園」，封面係一隻貓舉起隻爪，唔知何B仔係呷醋，定係以為有其他貓想襲擊佢，竟然出爪爪本書，畀佢激死﹗
鏡頭新寵何B仔黎左之後，我幾乎日日都忍唔住，扲起相機日日幫佢影相。但奈何我兩支鏡頭都係四光圈，係屋企完全唔夠洗，出黎既相大都係一團毛球在郁。
尋日終於忍唔住，出旺角買左支50 1.8鏡頭，雖然平，但影出黎質素唔差，六百幾蚊絕對抵玩﹗再用另一支新買的SIGMA 24-70mm 2.8，出黎效果都冇支1.8咁好，話左貴野未必一定好啦。睇怕我由今日起，都會日日用呢支50 1.8幫何B仔影相。
何B仔失控何B仔初初踏入何家，成隻鵪鶉咁，得閒就只識匿在梳化底，絕對唔敢行出廳範圍，連廁所都唔敢去，最後竟然用新買的貓床當廁所。
一個星期後的今天，牠已經通屋走，仲要以九秒九的速度，左撲右撲，又會偷襲我和屋企人的手腳，偷襲完又閃得無影無蹤，得閒無事追住自己條尾團團轉，又咬被又咬衣架，我以前都養過貓，但都未見過一隻咁鬼活躍。城珠話何B仔思覺失調，我覺得呢個形容詞絕對貼切。
我屋企三間睡房都畀何B仔去勻，但唔知點解佢最鍾意逗留在我細佬間房，仲成日跳上我細佬張床。我今日一返到屋企，我細佬講笑咁要求我換房，原來何B仔尋晚跳左上佢床同佢孖鋪，今朝我細佬睜大眼，就見一團大毛球在旁邊，嚇死佢咁話喎。其實我都不知幾想何B仔跳上我床陪我睡，耐何我睡上格床，以佢今日咁既身型，睇黎未有耐跳得上。 |
|
|
